manisha tomer's blog

Phoolon ki sej pe sona to sabhie jaante hai,

Kaanton ko humrahi bana liya…….To kuchh aur hi baat hai!

Maang ke lena to sabhie jaante hain,

Bin maange sab mil gaya……..To kuchh aur hi baat hai!

Gamon pe aansoo bahaana to sabhie jaante hai,

Gar gam bhi khushi se guzaar diya……..To kuchh aur hi baat hai!

Jhuk-jhuk ke salaam karna to sabhie jaante hain,

Utha sar jhukne na diya……..To kuchh aur hi baat hai!

Dil aakhir dil hai, ye to sabhie jaante hain,

Dil ko mandir bana liya………..To kuchh aur hi baat hai!

Niraash ho, haar ke baith jaana to sabhie jaante hain,

Aasha ki kirnon se jeevan roshan kiya…….To kuchh aur hi baat hai!

Hanste ko rulaana to sabhie jaante hain,

Rote ko hansaa diya…….To kuchh aur hi baat hai!

Phisal ke gir jaana to sabhie jaante hain,

Phisalni dagar pe hi kadam mazbooti se jamaaya……To kuchh aur hi baat hai!

Phool todna to sabhie jaante hain,

Murjhaaya phool khila diya……..To kuchh aur hi baat hai!

Manzil ke peechhe bhaagna to sabhie jaante hain,

Toofan ko hi manzil bana liya……To kuchh aur hi baat hai!

Chot karne se patthar toot jaate hain, sabhie jaante hain,

Pyaar se jo patthar pighla diya…….To kuchh aur hi baat hai!

Lehron ka ret pe likhe naam mita dena to sabhie jaante hain,

Lehar utarne pe bhi naam likha reh gaya……To kuchh aur hi baat hai!

Bal ki jeet hoti hai, sabhie jaante hain,

Atm-bal se hi sab paa liya……To kuchh aur hi baat hai!

Uth’te ko giraana to sabhie jaante hain,

Girte ko jo utha diya…….To kuchh aur hi baat hai!

Ae dost, tujhe dushman banaana to sabhie jaante hain,

Dushman ko bhi dost bana liya…….To kuchh aur hi baat hai!

Eent-patthar ke gharon mein rehna to sabhie jaante hain,

Sabke dil mein jo khushi ban ke raha kiya……To kuchh aur hi baat hai!

Mushkilon mein ghabrake saath chhodna to sabhie jaante hain,

Haath jo aur kas ke thaam liya……To kuchh aur hi baat hai!

Mumkin ko kar lena to sabhie jaante hain,

Namumkin ko mumkin bana liya…….To kuchh aur hi baat hai!

Insaan ka Bhagwaan kehlaana to sabhie jaante hain,

Insaan gar Insaan hi ban gaya…… To kuchh aur hi baat hai!

                                                                                                                       Mani