manisha tomer's blog

Kahin Kshetrawaad, kahin dharmonmaad,

Kahin bhaashawaad ka yuddh chhida,

Ab band karo, bas bahut hua

Ab Rashtrawaad ki baari hai!

Na tu Hindu hai , na hai Muslim,

Na Parsi, Sikh, Eesaai hai!

Is bantwaare se hum ghulaam hue,

Sada vipada desh par aayee hai!

Algaav-waad ki neeti se-

Jo Raajneeti chamkaate hain

Sab kaan kholkar weh sun lein-

Ab Raashtraneeti ki baari hai!

Tu na Marathi, na Punjabi,

Na hi tu Madrasi hai!

Rrin hai is desh ka bahut bada-

Bas tu ek Bharatwaasi hai!

Ekta mein Shakti hoti hai…..

Kitaabon mein to bahut padha:

Kewal padhna hi bahut hua-

Ab dikhlaane ki baari hai!

Ukhaad phekenge hum unko-

Jo Bharat ke tukde karte hain

Maharashtra, Assam, Kashmir mein rehne ka….

Har Bhartiya adhikaari hai!

Wahi hamaara asli Neta-

Jo Rashtrawaad ki baat kare

Jo Neta ban humko tode….

Wo Bhartiya nahin wo bahari hai!

BharatMaa ke chhalni seene ko

Dekhke bhi tu kab tak soyega?

Uth nidra se tu jaag zara….

Ranbheri ki taiyyaari hai!

Jis mitti mein tu janma hai,

Usse hai kaunsa dharm bada?

Hindu-Muslim bana tu phirta hai

Aisi bhi kya laachaari hai?

Kya is din ke liye Bhagat Singh phaansi chadhaa?

Azaad ne khaayee goli hai!

Ban Shoorveer ban Mahaveer

Kayarta tujh par bhaari hai!

Apne ghar mein hi tu darta hai

Aisa din ye hai kyun aaya?

Uth jaa teri Maa roti hai-

Uske tukde karne ki taiyyaari hai!

Ye jaan to ik din jaani hai-

Ise kab tak tu sambhaalega?

Mar gaya to Shaheed kehlaayega

Jeena-marna to jaari hai!

Chhod de Mandir-Masjid ko

Ye Desh hi Geeta-Quran hai!

Is jang mein shaamil hone ki-

Ab Ram-Rahim ki baari hai!

Hamaara karm bhi hai Bharat

Aur dharm hamaara bhi Bharat!

Hum sabne milkar thaan liya…

Ab Raashtradharm ki baari hai!

‘Jai Hind’ ‘Jai Bharat’

Mani