manisha tomer's blog

Shaken out of the blissful slumber again by the Mumbai blasts….

    Zindagi mein kuchh achchha karne ke liye hi itna kam samay hai, logon ko itna bura karne aur sochne ka samay kahan se mil jaata hai…….Kaise raakshas hain jo nirdoshon ka khoon behta dekhkar khush hote hain????

Ik aag -si lagi hriday mein,

Use kis tarah bujhaaun mein?

Sansaar mein chhaaye is andhkaar mein,

Prakash karne ko upaay kya sujhaaun mein?

Anyay atyaachaar ki jwaala thandi karne ko-

Nirmalta, swachchhata ki boondein kahaan se laaun mein?

Dukhon ki is bheed mein mook darshak rehkar-

Apni aatma ko kya munh dikhlaaun mein?

Vedna ke is bheeshan cheetkaar ko,

Kewal kuchh shabd likhkar kaise mitaaun mein?

Har ore insaaniyat ka ghutataa galaa dekhkar,

Apna maanavdharm kis prakaar nibhaaun mein?

Apne bheetar ke insaan ko har pal hi jagaaun mein!

Is jag mein vyaapt anaachaar ke viruddh-

Kadachit kuchh to kar paaun mein!

Ishwareeya prerna ki aasha mein

Hriday mein ik jyot jalaaun mein

Apne kartavyapath par chalkar hi

Apna jeevan safal banaaun mein!

Us Parampita ke dikhlaaye maarg par

Dinodin badhti jaaun mein………………..

                                                                             Mani

Read Full Post »

Bachpan ki wo yaad suhaani….

Jab bhi kabhie mujhe aati hai

Man mein umangon ki nai kahaani,

Jaise wo likh jaati hai

Kabaddi ka wo khel anokha-

Kaisi khushi le aata tha

Koyal ka pratiyogi ban kookna-

Man ko kitna bhaata tha 🙂

“Mani beta ke liye jalebi laao!”

Jab Nanaji kehte the

Babaji paas baithaker-

Ramayan, Mahabharat sunte the!

Saawan ke wo geet anoothe-

Jhool-jhool hum gaate the

Chhoti-si ek roti banakar taareef sabse karvaate the!

Jab hum to bahut -hi achchhe the 

Aur sab humse bhi achchhe the 🙂

Bachpan ki wo yaad suhaani-

Jab bhi kabhie mujhe aati hai

Roshni ke karono diye

Jaise jalaa wo jaati hai! 🙂

                                               Mani

Read Full Post »

Bulbule-si ye zindagi….
Pal-pal kitne roop badalti-
Kabhie to saare rangon se chhalak uthati,
Kabhie sirf saleti-si reh jaati
Ek hi pal…phool mehek uthate,
Man gaa uthate, hanste-khelte, ithalaate
Dooje hi pal…muskaata chand pheeka-sa ho jaata
Raat ke ghane andhkaar mein na jaane kahan gum ho jaata
Kabhie shaant nadi-si behti jaati
Kabhie ek aandhi sab tehes-nehes kar jaati
Kabhie saare jawaab de…hairaan kar jaati
To kabhie khud hi ek sawaal ban jaati
Bulbule-si ye zindagi…..
Bas abhi thi aur abhi nahin
Kabhie aansoo kabhie hansi bankar-
Kathputli-sa sabko nachaati
Bulbule-si ye zindagi…….

Mani

Read Full Post »

Holi aap sabhie ke jeevan mein samast rangon ki bahaar laaye…….
Ugte suraj ki laalee, hriday mein aashaon ki lau jalaaye………
Hara rang prakriti ka,jeevan-bagiya hari-bhari kar jaaye……..
Peela rang sarson ka,hamein basanti chola pehnaaye………
Gulaabi rang sapneele nainon mein,meethe sapnon ka sansaar banaaye……..
Neela rang aakash ka,pratidin naveen shikharon par le jaaye……..
Bhura rang mitti ka, Bharat-bhumi ki yaad dilaaye………
Sunehri rang dhoop ka,sabhie ke jeevan ko aalokit kar jaaye……..
Shwet rang sab rangon ke mishran se banaa, sampoorn sansaar ko shanti aur prem se rang jaaye…….
                                                                                                                                                                                                          Mani 🙂

Read Full Post »

I wrote this poem in 1985 when all the nations had the ambition to become nuclear powers and it scared me…..did not know that it will stll have relevance after so many years, the only word that needs to be changed I think is ‘Yuddh’ It should be substituted with ‘Haadsa’. I dedicate this to Japan as I feel sorry for the awful disaster and  sincerely pray to God to forgive our mistakes and help Japan and the whole world ….. 

Ye Parmanu-yuddh humein kahan le jaayega?

Jale the ik din jis aag mein Hiroshima aur Nagasaki….

Usi mein poora vishva jal jaayega,

Ye parmanu-yuddh humein kahan le jaayega?

                   Abhi-abhi janme bachchon ke kaanon mein-

                   Padengi bhayanak dard ki karahein

                   Jin kaanon ka swagat madhur sangeet se hota-

                   Unhi ko sunayi dengi cheekhein!

Mritu ko pehle praapt kar chuke vyaktiyon ki aatmaayein-

Saraahengi apne bhaagya ko-

“Mukti mili pehle hi humein….

 Nahin sehna pada is dard ko!”

                   Yeh sab jaante hue bhi maanav-

                    Kyun dhakel raha hai swayam ko….

                    Maut ke mukh mein!

                    Kyun paida kar raha hai apne hi vinaash ke saadhan is jag mein!

                                                                                                                                                   Mani (Dec 1985)

Read Full Post »

Ishwar ne tujhe rachna ke liye racha,

Sansaar ka har jeev tujhmein hi basa-

Kya tu abla aur bechaari hai?

Nahin, tu naari hai!

                                        Dharti jaisi tu, sab sukh-dukh bheetar samaaye

                                         Kasht paakar bhi tu hi hai jo sada muskaaye;

                                         Kya tu bebasi aur dukh ki maari hai?

                                          Nahin, tu naari hai!

Tu hi to lajja ki laali hai,

Saamne anyay ke tu Kaali hai!

Kya tu is jeevan ke sangharsh se haari hai?

Nahin tu naari hai!

                                                                                                      ‘Mani’

Read Full Post »

Sardi ne jabse pehni hai,

 Ghane kohre ki wardi,

 Sabhie mujrim se ban baithe –

 Munh par chhayee hai zardi

 Gharon ko bana diya hai jail,

 lagi hai tope-jacketon ki relampel,

 Bazaar mein niklo-

 Har jagah hai 50% sale

 Bachchon ko ye kyun lagti nahin jaane???

 Unhein to abhi hi jaana hai patang udaane!!!

 Aur mein baithi hun na yahin-

 Pitaji ki daant khaane!!!!

 Chhote ne to bilkul hi hai kiya gazab!

 “Mamma, munh se dhuan nikalo!” farmaish hai ye ajab

 Din-raat khush use karne mein-

 Pichka gubbara ban gayi hun ab! (Bachaao!!!)

 Mumbai, Goa ki photo koi na dikhaana,

 Mere jame hue dil par aur barf na barsaana,

 Tumhein Bhagwaan ka vaasta-

 Aisa sitam na dhaana!

 Nahin dekha kabhie aisa thaanedaar bedardi,

 “Haye re sardi!”  “Haye re sardi!”

 Sardi ne jabse pehni hai-

 Ghane kohre ki Wardi 🙂

                                                  “Mani”

Read Full Post »

Achchha lagta hai……

 Rang-bhare phoolon ka,

 Kaanton ke beech hi khil jaana……

 Sukh-dukh ki lehron mein,

 Doobna-utraana…….

 Bachchon ki meethi-si baaton mein,

 Apna bachpan paa jaana…….

 Nit-naye sapnon mein,

 Khuli aankhon se hi kho jaana……

 Ek chidiya ka roz mere darwaaze pe,

 Na jaane kyun dastak dena…….

 Aur khidki par har din,

 Do gilheriyon ka athkheliyaan karna…..

 Doobte suraj ki laali mein hi,

 Chaand ka khil jaana……

 Aur phir mere kamre mein taak-jhaank kar,

 Chaandni ka chhitak kar aa jaana…..

 Saawan ki phuharon mein do indradhanush dekh,

 Man ka pulkit ho jaana…….

 Sardi ke ghane kohre mein kanpkanpaakar,

 Daant kitkitaana…….

 Thandi hawa mein haule-haule,

 Koi geet gungunaana…….

 Bebaat-si baaton par,

 Yun hi khilkhilaana……

 Aise hi chhote-chhote maasoom palon se,

 Zindagi ke panne bharna…..

 Achchha lagta hai 🙂

                               “Mani”

Read Full Post »

नववर्ष की नई भोर में

नया स्वप्न फिर बुनती हूँ

नई उम्मीदें नया हौसला

नए तराने सुनती हूँ

नए सूर्य की किरण-किरण से

आलोकित हो उठती हूँ

चिड़ियों के मधुर कलरव में

नए संदेसे सुनती हूँ

इंद्रधनुष के रंग सभी

मन में पल-पल भरती हूँ

ईश्वर की अद्भुत रचना से

अभिभूत हो उठती हूँ

मणि

Read Full Post »